Read this page in English

Yn fy mlog diwethaf, ym mis Tachwedd, gwnes i sôn yn fras am ap cyntaf MapDataCymru, Teithio Llesol. Yn y post hwn, dwi am roi rhagor o fanylion am hyn a’r elfen beta, ac esbonio beth sy’n digwydd nesaf.

Y daith hyd yma

I unrhyw un sy’n ddiarth â MapDataCymru, dyma beth rydym am ei wneud:

Yn fras, ein gweledigaeth yw creu un ffynhonnell ddata geo-ofodol a phlatfform prosesu ar gyfer holl ddata geo-ofodol sector cyhoeddus Cymru. Y nod yw creu platfform data cyffredin i gyrff cyhoeddus allu cyhoeddi eu data, er mwyn i bawb gael mynediad at y data sydd eu hangen arnynt; y Llywodraeth, y Dinesydd, y Sector Gwirfoddol a Masnach.

Yn dilyn ein fersiwn alffa, cafodd fersiwn beta MapDataCymru ei lansio ar 1 Mawrth ac y mae nawr ar agor i’r cyhoedd ei brofi.  Mae’r fersiwn ar gael i bawb ei defnyddio, ac yn golygu y cewch bori a chwilio ynddi, addasu mapiau, lawrlwytho data a gweld ffrydiau byw o feddalwedd GIS.

Mae’n cefnogi sawl agwedd ar y Strategaeth Ddigidol newydd i Gymru.  Wrth ddatblygu MapDataCymru rydym wedi dilyn safonau digidol drafft y Ganolfan Gwasanaethau Cyhoeddus Digidol a gweithio gyda defnyddwyr y system i wneud yn siŵr ei fod yn ateb eu gofynion trwy gyfres o ganllawiau ac esboniadau cyflym. Mae’n cefnogi’n huchelgais hefyd i ddarparu data a gwasanaethau cydgysylltiedig, gan ddefnyddio platfformau cyffredin, a gwneud yn siŵr bod y data ar gael yn rhwydd i’r rheini sydd am eu defnyddio. 

Beth yn gwmws yw Beta?

Yn y fersiwn Beta, byddwn yn cymryd y syniadau gorau o’r fersiwn alffa a dechrau  eu datblygu.  Mae’n golygu meddwl sut bydd ein gwasanaethau’n clymu â gwasanaethau eraill (neu’n dechrau cymryd eu lle) a pharatoi ar gyfer mynd yn fyw.

Ein hamcan yn y cam hwn yw canolbwyntio ar wneud yn siŵr bod yr hyn rydym wedi’i ddatblygu yn y cam alffa (yn yr achos hwn, MapDataCymru) yn gweithio cystal ag y gall trwy gynnal ymchwil gyda defnyddwyr a dechrau casglu data ynghylch pa mor lwyddiannus yw’r gwasanaeth a’i addasu yn ôl yr hyn a ddysgwn gan ddefnyddwyr.   

Beth sydd ei angen ichi ei wneud

Wrth inni gasglu’r ymatebion yn ystod y cam beta ac wedi hynny, byddwn yn caboli MapDataCymru fel ei fod yn gallu gwneud y pethau y dylai allu eu gwneud a bod ganddo’r offer i gefnogi’n gwasanaethau cyhoeddus, ein pobl a masnach.

Rydym felly am i bawb roi cynnig arno a rhoi eu hymateb da a drwg i ni, er mwyn i ni allu adeiladu ar y gwaith sydd wedi’i wneud hyd yma.  Rydym am wybod am unrhyw broblemau ac am unrhyw drafferthion gyda’r Gymraeg neu wrth gysylltu â’r system. Byddwn hefyd am fonitro cyflymder a pherfformiad, a hefyd unrhyw sylwadau am y data eu hunain.

Os ydy hyn yn rhywbeth y byddech chi am gymryd rhan ynddo, neu’ch bod jest am weld beth ydyn ni wedi bod yn ei wneud, yna ewch i safle beta MapDataCymru trwy glicio ar y ddolen hon: https://mapdata.llyw.cymru/

Ac os oes gennych chi ymateb, rhowch wybod i ni yn: DMWSupport@gov.wales

Teithio Llesol –  Ein ap cyntaf

Rhag ofn nad ydych wedi clywed am Deithio Llesol, mae Deddf Teithio Llesol (Cymru) 2013 yn rhoi nifer o ddyletswyddau ar Awdurdodau Lleol. Un ohonyn nhw yw cynhyrchu map o’u llwybrau teithio llesol, a’r llwybrau sydd ar y gweill, yn eu hardal. Y rhain fydd y Map Rhwydwaith Teithiau Llesol sef glasbrint yr awdurdod llesol o’i rwydwaith o deithiau llesol integredig. 

Felly beth yw’r cysylltiad rhwng hynny a MapDataCymru? Wel, ap Teithio Llesol MapDataCymru yw’r system newydd i awdurdodau lleol allu paratoi eu Map Rhwydwaith ac ar gyfer cyflwyno’r map i Weinidogion Cymru ei gymeradwyo.

Trwy weithio’n glos â thîm Teithio Llesol Llywodraeth Cymru, Awdurdodau Lleol a’n partneriaid allanol dros yr 8 mis diwethaf, rydym wedi datblygu ap MapDataCymru ddaeth yn fyw ar 1 Mawrth.  Mae’n golygu bod Awdurdodau Lleol bellach yn gallu rheoli data Teithio Llesol mewn un lle, gan olygu bod un lle y gall staff a Gweinidogion fynd iddo i weld darlun cyflawn o Deithio Llesol yng Nghymru.

Beth sydd ar y gorwel?

Mae MapDataCymru’n parhau i gael ei ddefnyddio i gefnogi cynllun adfer Covid Cymru, gan gynnwys mapio’r safleoedd gorau ar gyfer cynnal canolfannau brechu, nodi’r amser teithio i ysbytai dros dro a chynllunio ar gyfer Cymru iachach trwy fentrau fel y Cynllun Teithio Llesol.

Bydd yn effeithio hefyd ar y byd ar ôl Covid, trwy gynllunio, ymgynghori, dadansoddi, rhannu a deall ein byd ffisegol a rhifyddol a’r ffyrdd newydd rydym am ymwneud â’n gilydd, yn ein gwaith a hamdden.

Mae gennym nifer o apiau eraill ar eu ffordd, yn ymdrin â nifer o bynciau fel yr amgylchedd, trafnidiaeth, diogelu’r cyhoedd, iechyd a lles, ymgynghoriadau, y môr, cynlluniau argyfwng, rheoli asedau ac addysg. Mae gennym ddigon i’w wneud felly!

Byddwn wrth gwrs am barhau i gadw mewn cysylltiad â chi, felly gwyliwch am y bwletinau nesaf am FapDataCymru.

Kevin Williams – Rheolwr Cynnyrch MapDataCymru