Ar ddiwedd mis Medi, lansiwyd gwasanaeth newydd StatsCymru – carreg filltir fawr yn ein gwaith i wneud ystadegau Llywodraeth Cymru yn haws i’w cyrchu a’u defnyddio. Ychydig fisoedd yn ddiweddarach, roeddem am rannu rhannu diweddariad ar sut mae pethau’n mynd, beth rydym wedi’i ddysgu, a beth sy’n dod nesaf.

Read this page in English.

Beth sydd wedi gwella hyd yn hyn

Ers ei lansio, rydym wedi bod yn cyhoeddi pob set ddata newydd ac wedi’i diweddaru ar y gwasanaeth newydd. Os ydych chi’n chwilio am y ffigurau diweddaraf, mae hyn yn golygu y gwelwch nhw ar y platfform newydd.

Rydym wedi bod yn gweithio’n galed y tu ôl i’r llenni hefyd i symud setiau data presennol o’r hen wasanaeth. Gyda nifer bach iawn o eithriadau yn unig, bydd y mudo hwn wedi’i gwblhau erbyn 16 Ionawr 2026. O hynny ymlaen, ni ddylai fod angen ichi newid rhwng y ddau wasanaeth bellach i ddod o hyd i’r hyn y mae arnoch ei angen.

Dros yr ychydig fisoedd diwethaf rydym wedi bod yn dysgu am sut rydych chithau – a’n cynhyrchwyr setiau data – yn defnyddio’r gwasanaeth. Yn seiliedig ar hynny, rydym wedi gwneud rhai gwelliannau a datrysiadau cyflym i wella’ch profiad. Mae’r rhain yn cynnwys:

• gweld hanes set ddata: erbyn hyn gallwch weld hanes newidiadau i set ddata, gan ei gwneud hi’n haws olrhain diweddariadau
• dewisiadau briwsion bara: rydym wedi ychwanegu llwybr briwsion bara fel y gallwch weld ble rydych chi a llywio’n haws
• trin setiau data mwy: gall y gwasanaeth bellach reoli setiau data mwy heb broblemau perfformiad

Beth sy’n dod nesaf

Er bod llawer o ddefnyddwyr wedi dweud wrthym eu bod yn hoffi’r dyluniad glanach a gwell hygyrchedd, rydym yn cydnabod nad yw’r adborth wedi bod yn gadarnhaol yn gyffredinol. Nid yw rhai nodweddion yr ydych chi wedi dibynnu arnynt yn y gorffennol ar gael eto, ac mae hynny’n rhywbeth yr ydym yn mynd i’r afael ag ef.

Mae dwy o’r nodweddion y gofynnwyd amdanynt fwyaf eisoes yn cael eu datblygu.

Creu’ch tabl eich hun

• Mae hyn yn fater o bwys. Rydym yn gwybod pa mor bwysig yw hi i ddefnyddwyr addasu tablau i weddu i’w hanghenion. Rydym yn falch o gadarnhau y dylai’r nodwedd hon fod ar gael erbyn mis Chwefror.

Swyddogaeth chwilio

• Gwelliant arall y gofynnwyd amdano yn helaeth, yn enwedig wrth inni ychwanegu rhagor o setiau data at y gwasanaeth. Rydym yn gweithio ar ychwanegu nodwedd chwilio i’w gwneud hi’n haws ac yn gyflymach dod o hyd i setiau data.

Yn ogystal, pan gyhoeddwyd Mynegai Amddifadedd Lluosog Cymru y mis diwethaf, gwnaethom sylweddoli bod angen ichi allu dewis mwy o hidlwyr nag y mae’r gwasanaeth yn ei ganiatáu ar hyn o bryd – er enghraifft, pob ardal fach o fewn awdurdod lleol, a all fod dros 100. Rydym yn gweithio i drwsio hyn fel y gallwch wneud y dewisiadau hyn yn haws.

Mae’r gwelliannau hyn yn rhan o’n hymrwymiad i barhau i wella StatsCymru yn seiliedig ar yr hyn sydd bwysicaf ichi.

Cau hen wasanaeth StatsCymru

Dywedwyd yn flaenorol y byddai’r hen wasanaeth StatsCymru yn dod i ben ddiwedd mis Ionawr. Fe wnaethoch chi ddweud wrthym y byddai’n well gennych gael mwy o amser i ddod i arfer â’r gwasanaeth newydd, felly rydym wedi ymestyn hyn.

Gallwn gadarnhau bellach y bydd hen wasanaeth StatsCymru yn dod i ben ar 2 Mawrth 2026.

Beth mae hyn yn ei olygu i chi

• Ar ôl 2 Mawrth, ni fydd yr hen blatfform bellach yn hygyrch.
• Os oes gennych nodau tudalen neu ddolenni wedi’u safio i’r hen wasanaeth, ni fydd y rhain yn gweithio bellach. Byddwn yn ailgyfeirio URLau, ond rydym yn argymell eich bod yn diweddaru eich un chi i’ch cyfeirio at wefan newydd StatsCymru.
• Bydd angen i unrhyw ddangosfyrddau neu wasanaethau awtomataidd sy’n echdynnu data ddiweddaru eu cysylltiadau i gyfeirio at wasanaeth newydd StatsCymru.

Daliwch ati i roi adborth

Mae eich adborth wedi bod yn amhrisiadwy wrth lywio StatsCymru newydd, a bydd yn parhau i lywio’r hyn a wnawn nesaf. Os oes gennych unrhyw wrthwynebiadau neu bryderon, rhowch wybod inni. Mae hwn yn wasanaeth i bawb sy’n defnyddio ystadegau Llywodraeth Cymru, ac rydym am iddo weithio i chi.