Mae’n flwyddyn ers i ni gyhoeddi Cynllun Gweithredu Seiber i Gymru sy’n nodi ein gweledigaeth bod Cymru’n ffynnu trwy seibergadernid, talent ac arloesedd.
Mae gan y Cynllun bedwar maes blaenoriaeth i’n helpu i gyflawni ein gweledigaeth:
- datblygu ein hecosystem seiber
- creu llif o dalent seiber
- cryfhau ein seibergadernid; a
- diogelu ein gwasanaethau cyhoeddus
Gallwch ddarganfod mwy pam ein bod yn canolbwyntio ar y blaenoriaethau hyn ar ein blogiau blaenorol.
Ble’r ydym flwyddyn yn ddiweddarach?
Mae llawer wedi digwydd yn y flwyddyn ddiwethaf.
Rydym newydd sefydlu CymruSOC, canolfan gweithrediadau diogelwch cenedlaethol cyntaf y DU yng Nghymru. Bydd yn diogelu awdurdodau lleol Cymru, y Gwasanaeth Tân ac Achub a bydd yn diogeli data’r rhan fwyaf o boblogaeth Cymru, gan sicrhau y gall ein gwasanaethau cyhoeddus hanfodol barhau heb eu tarfu oherwydd seiber-ymosodiadau.
Mae’r Hyb, sy’n cael ei arwain gan Brifysgol Caerdydd, yn dod â phartneriaid diwydiant, llywodraeth, amddiffyn ac academaidd at ei gilydd i dyfu’r sector seiberddiogelwch yng Nghymru, gyda buddsoddiad o £3 miliwn gan Lywodraeth Cymru. Mae yn anelu at hyfforddi mwy na 1,500 o unigolion â sgiliau seiber, creu mwy na 25 o gwmnïau twf uchel, a denu mwy na £20 miliwn mewn buddsoddiad ecwiti preifat erbyn 2030.
Mae Gweinidogion Cymru hefyd wedi cadeirio trafodaethau bwrdd crwn gyda diwydiant, y byd academaidd, cynrychiolwyr sgiliau a’r llywodraeth i helpu i ddatblygu Cynllun Gweithredu Seiber Cymru.
Mae’r byrddau crwn hyn wedi rhoi cyfle i ganolbwyntio ar gryfderau’r sector seiber sy’n cynnwys:
- Technoleg weithredol (OT);
- Gwybodaeth, Monitro, Canfod a Dadansoddi Bygythiadau;
- Gwyddor Ymddygiad / Ffactorau Dynol; ac
- Ymchwil academaidd a galluoedd addysgol.
Mae sefydliadau yng Nghymru sydd â’r gwahanol arbenigeddau hyn, yn cydweithio’n agos i greu system gydgysylltiedig a all gygysylltu’n gyflym. Mae cydweithrediad agos ein hecosystem seiber yn rymus ac yn gosod Cymru ar wahân i wledydd eraill y DU.
Drwy ein gwaith gyda diwydiant, rydym wedi mireinio ein neges yn y DU ac yn rhyngwladol am yr hyn a wnawn yn dda yng Nghymru, a fydd yn cefnogi twf ein hecosystem seiber.
Cefnogi talent seiber
Mae’r byrddau crwn hefyd wedi canolbwyntio ar sut iddenu, datblygu a chadw’r sgiliau seiber sydd eu hangen arnom yng Nghymru. Mae ymgysylltu â diwydiant a’r byd academaidd wedi ein helpu i greu darlun o’r llwybrau i yrfa yn y maes seiber, o oedran ysgol i ailhyfforddi’r gweithlu.
Mae adeiladu’r ddealltwriaeth hon wedi arwain at gydweithio pellach dan arweiniad y diwydiant i sbarduno dull cydgysylltiedig o ddatblygu sgiliau seiber. Bydd hyn yn manteisio i’r eithaf ar y ffordd y mae diwydiant yn cefnogi’r byd academaidd ac addysg fel bod y bobl yr ydym yn eu hyfforddi yn gwybod bod ganddynt ddyfodol yma yng Nghymru.
Er mwyn cael y sgiliau cywir i ddatblygu ein ecosystem seiber, mae angen i ni gefnogi sector mwy amrywiol a chynhwysol ac mae gennym sylfaen dda i adeiladu arni gyda chlwstwr ‘Menywod mewn Seiber Cymru’ a CyberFirst i Ferched. Ym mis Chwefror 2024, cynhaliodd Menywod mewn Seiber Cymru Gynhadledd Genedlaethol Menywod mewn Seiber yn y Ganolfan Gynadledda Ryngwladol yng Nghasnewydd.
Beth nesaf?
Gyda’n gilydd, gyda chefnogaeth diwydiant, byddwn yn parhau i gyflawni’r Cynllun Gweithredu Seiber i Gymru ac yn cydweithio â’n rhanddeiliaid i gyflawni ein gweledigaeth ar y cyd bod Cymru’n ffynnu trwy seibergadernid, talent ac arloesedd.
Os ydych yn gweithio mewn sefydliad sector cyhoeddus ac â diddordeb siarad â ni am sut y gallai eich gwaith gyfrannu at Gynllun Gweithredu Seiber Cymru, rhowch eich sylwadau isod i gysylltu â ni.
Blog Digidol a Data 