Postiad gan Steven, Uned Gwyddor Data, Llywodraeth Cymru
Mae gwyddor data yn sgil allweddol i drawsnewid ein gwaith o fewn Llywodraeth Cymru, gan ein bod yn ei defnyddio i foderneiddio ac awtomeiddio prosesau data a’n helpu i weithio’n effeithlon, yn dryloyw ac yn gywir. Mae’r uned gwyddor data wedi bod yn awyddus bob amser i helpu staff i ddysgu a gwella eu sgiliau gwyddor data, ac yn ddiweddar rydym wedi dechrau dwy fenter newydd i gefnogi’r nod hwn.
Seminar gwyddor data amser cinio
Mae’r uned gwyddor data yn cynnal seminar misol lle rydym yn arddangos ein gwaith prosiect ac yn trafod technegau a dulliau gwyddor data a Deallusrwydd Artiffisial (AI). Bu’r sesiynau yn rhedeg ers 2022 ac maent wedi bod yn ffordd wych o gysylltu â chydweithwyr o bob rhan o Lywodraeth Cymru sy’n chwilfrydig am wyddor data a’r gwaith yr ydym yn ei wneud. Yn ddiweddar, cawsom ein siaradwyr cyntaf yn Llywodraeth Cymru y tu allan i’r uned gwyddor data a rannodd rywfaint o’u gwaith anhygoel a oedd yn cynnwys awtomeiddio, Prosesu Iaith Naturiol (NLP) a Dysgu Peiriant (ML). Amlygodd y trafodaethau hyn y gwaith creadigol sy’n digwydd mewn meysydd eraill megis Gwasanaethau Gwybodaeth a Dadansoddol (KAS) Llywodraeth Cymru.
O fis Gorffennaf ymlaen, bydd y sesiynau seminar ar agor i’r sector cyhoeddus ehangach mewn cydweithrediad â’r Ganolfan Gwasanaethau Cyhoeddus Digidol (CDPS) a Data Cymru. Bydd y sgwrs gyntaf yn edrych yn ôl ar sut mae gwyddor data wedi esblygu o fewn Llywodraeth Cymru dros y blynyddoedd diwethaf, gan arddangos rhai o’r llwyddiannau a thrafod rhai o’r heriau. Efallai y bydd gan aelodau’r sector cyhoeddus ddiddordeb ymuno i weld sut mae ein llwybr gwyddor data wedi mynd â ni o Excel a phecynnau ystadegol perchnogol i ddefnyddio offer megis R a Python ar gyfer Modelau Iaith Mawr (LLM) yn ystod yr ychydig flynyddoedd diwethaf.
Cynllun mentora gwyddor data
Rydym hefyd yn teimlo’n gyffrous iawn ein bod wedi lansio cynllun mentora mewnol ar gyfer cydweithwyr sydd eisiau arweiniad i roi cynnig ar dechnegau newydd a chyflwyno prosiect gwyddor data ar gyfer eu hardal. Bydd y cynllun mentora yn paru staff â gwyddonydd data a all gynghori ar ddulliau, helpu i drwsio’r cod a mireinio sgiliau data’r mentoreion tra’n sicrhau canlyniad effeithiol a gwerthfawr.
Mae’r gyfres gyntaf o brosiectau a dderbynnir ar gyfer y cynllun yn ymdrin â phynciau fel awtomeiddio dadansoddi, creu adroddiadau ar gyfer adrannau, gwella hygyrchedd data presennol ac archwilio technegau modelu i wella modelau cyfredol. Rydym yn awyddus i weld sut mae’r cynllun yn datblygu ac yn cydnabod y potensial i hybu sgiliau technegol ein staff tra’n helpu i gyflawni gwaith ystyrlon.
Adeiladu sgiliau ar gyfer y dyfodol
Mae moderneiddio, effeithlonrwydd ac awtomeiddio yn hanfodol i drawsnewid defnydd Llywodraeth Cymru o ddata. Mae mentrau fel y gyfres seminarau yn ceisio annog y sector cyhoeddus ehangach i wneud yr un peth, tra bydd y cynllun mentora yn helpu i wella ein sgiliau yn fewnol. Mae gan yr uned gwyddor ddata ymrwymiad parhaus i ehangu gallu gyda gwyddor data ac AI yn y sector cyhoeddus yng Nghymru, bydd blogiau ar gael yn y dyfodol am ein gwaith prosiect.
Blog Digidol a Data 